أوجاع الستات

هل أكتب هذا من أجل أن يكون قاموسا جامعا لشكاوى الستات في بلدنا؟ فهناك بعض الكتب حتى الأجنبي منها الذي يقوم بذلك، فاللعب على الوتر الحساس والضغط على الجروح عادة ما يحقق صدى واسعا من الانتشار فعندما يكون الكتاب (ساحة عامة لندب الحظ) سليجأ إليه الكثير من باب اللي يشوف بلاوي الناس تهون عليه بلوته، وسيلجأ إليه آخرون من باب التشفي في أي حد والسلام، أم أني أكتب هذا الكتاب لشن هجوم جديد على جنس الرجال؟ فأيضا من أكثر ما يذيع من صيت أي شخص أن ينحاز إلى فريق ويبدأ في مهاجمة فريق آخر، بالحق أو بالباطل. برضه مش مهم، لكن الهجوم في حد ذاته كده، طيب يمكن كتبت الكتاب ده من باب السخرية؟ علشان نضحك شوية يعني؟ أن برضه مش من أنصار الموضوع ده، لأنه بصراحة مش أي كلمتين يتقال عليهم أدب ساخر، وحتى الأدب الساخر لازم يكون له مضمون وبيقدم فكرة، مش بس كلام يضحك وتخرج منه زي ما دخلت. طب لما هو لا كده ولا كده ودوكهوه، أمال باكتب الكتاب ده ليه؟ وبعد ما تعتبت وتعبتكم معايا، لقيت إني باكتب الكتاب ده من كل قلبي عشان سببين رئيسيين، عايزين تعرفو هما إيه؟